By 芳姐 ( 20 8 月, 2020 at 8:20 上午)
· Filed under 不同類型體質, 保護視力/耳、鼻、喉疾病, 家常湯餸／雜病
中年人如果工作過勞，保養得不好，較易出現頭暈耳鳴、視物昏花、腰膝酸軟、頭髮早白等症狀，年長婦女更易有陰虛內熱情況，一般陰虛的人皆怕熱，會自覺或不自覺的發熱，常常表現為手心、足心、心口發熱，黃昏及晚上易有潮熱盜汗症狀，夜熱早涼，伴口乾咽燥，頭暈、心悸、周身無力等。這類人士平時要多吃養陰之品。
「女貞子杞子響螺乾湯」能滋陰補益肝腎、明目、清虛熱。對頭暈目眩、視物昏花、頭髮早白、陰虛發熱人士很有益。
湯料中女貞子藥性平和，能補益肝腎、抗疲勞、提高身體免疫功能，更有明目、降血糖等功效。杞子也是補肝明目良藥，能提高免疫力；二物配合有「豆中之王」，具明目、黑髮、補肝腎、美肌膚之青仁黑豆，以及有滋陰補腎作用的響螺乾同煮，是一味滋補美味，補而不燥的家常湯水，對陰虛內熱者尤其適合。
用料是：女貞子5錢，杞子3錢，青仁黑豆2兩，紅棗5粒，大隻響螺乾3~4隻。
做法：各種材料浸洗淨；紅棗去核；響螺乾連蓋掩浸洗後出水；全部材料用8碗水煮個半鐘成4碗，即可連湯料同食。
~ 小貼士：響螺乾的蓋掩含豐富礦物質及維生素，故不要去掉，宜螺肉連蓋掩一齊煮才有益。但感冒發燒者不宜。
Permalink
芳姐你好，我想問我先生剛剛驗到有血癌，.
.醫生話如果活躍指數唔知指數高定低，我唔記得咗，就可以唔洗醫，唔係就要醫，如果早期發現是否可以做骨髓移植手術，是否會好啲，我個仔話如果真係好佢想捐骨髓比佢爸爸，同時有無湯水可以對病情會好
娟:
血癌宜多用滋陰健脾胃補血的材料，如淮山,杞子,蓮子,石斛,麥冬,桑椹子等，忌高脂肪,高糖及奶類食物.新鮮蔬果可多食,例如用紅菜頭,紅蘿蔔,番茄,紅腰豆煲瘦肉湯服.或用淮山,石斛,麥冬,杞子,桑椹子各適量煲肉湯.雞可以食但必須去雞皮.仔仔孝順,但手術前要多用些補益氣血的湯水作調理.例如四神湯加紅棗,杞子,桑椹子同煮烏雞湯,父子可以同飲.
芳姐你好，如果唔用紅棗，可否用乜嘢代替，是否食薄血丸都飲得，唔該芳姐
娟:
可用椰棗代替紅棗,椰棗不易升血糖.
芳姐你好，又要麻煩你，我先生同我講佢啱啱抽完肺水，醫生叫佢食番好啲個肝就冇事，所以我想你比啲意.見我，我想去睇中醫補番好個肝同個腎，好嗎？同時食啲乜嘢對個肝好，煲邊款湯水對肝同腎有益，我唔記得同你講我先生有痛風，所以蟲草孢子個款湯唔飲得，海底椰就得，原來有小小肝硬化都咁麻煩，芳姐多謝你
娟:
用五味子3錢,桔餅2個,紅棗5粒,5碗水煮成2碗服,一星期2~3劑,對肝硬化輕症者有益.赤小豆是痛風患者可以用的豆類,可用赤小豆煲冬瓜排骨湯服.宜看中醫作調理.
芳姐你好，我想問如果我揾唔到鵪鶉買，有無嘢可以代替，同時呢兩款湯煲幾耐。唔該芳姐
娟:
可用鷓鴣,竹絲雞或瘦肉代替鵪鶉,最緊要不要肥膩.
芳姐你好，西醫無得調理，無藥食，只有肺有水就要入院抽水，我先生昨晚入院抽腹水，醫院同佢照肺話有水，明日就抽肺跟住就抽腹水，我以為睇中醫會好啲，芳姐有無對肺部好嘅湯水，多謝芳姐你成日為我解答
娟:
你平時可以多給他吃新鮮水果和蔬菜,菇菌類食物,忌辛辣及煎炸食物,可以用蟲草孢子5錢,淮山1兩,杞子3錢,陳皮1個煲鵪鶉湯; 或用海底椰3錢,百合1兩,雪耳3錢,茯苓3錢南北杏1兩煲瘦肉湯供服都有益.各一星期2劑.
芳姐你好，桑椹子係唔係藥房胃，仲有四神湯煲紅棗，杞子，桑椹子煲烏雞，紅棗可否改用南棗求椰棗，烏雞需唔需要去皮，另一款湯麥冬寒唔寒涼，多謝芳姐你為我解答。
娟:
桑椹子在藥房買到,紅棗可改用南棗或椰棗,烏雞最好去皮才煮.麥冬你配淮山,石斛就不寒涼.
芳姐你好，我唔記得問蓮藕湯要煲幾耐，南棗要用幾多粒，還有肺部有水是否即是肺積水，如果睇中醫會唔會好啲，唔該芳姐為我解答
娟:
蓮藕湯煲2小時,南棗放5粒.肺積水先用西醫治理,西藥效果快速,康復後才用中醫調理較佳.中醫是整體觀含,不只是肺,其他臟腑一齊調理的.
芳姐你好，我想問唔用紅棗，可否用南棗或者用蜜棗可以嗎?紅棗我怕燥。唔該你芳姐
娟:
可用南棗代替紅棗.
芳姨，南棗是不是黑棗？
訪客:
南棗和黑棗不同,南棗經過多重手續製作,售價較貴,一般南棗皮絞緊緻,肉質結實,黑棗售價便宜,皮絞淺及肉質軟.
芳姐你好，我想問食緊薄血丸可唔可以飲一些補氣血湯水，因為我先生好多時都要返去醫院抽血，見醫生又要抽，佢有腹水漲得滯又要去醫院抽水，起碼抽6至7筒血，所以我覺得佢個面有啲黃，所以我想煲啲補氣血湯比佢飲，我想請問你煲啲乜嘢湯水適合佢飲，麻煩你答覆我
娟:
可用蓮藕1節,紅腰豆1兩,紅衣花生1兩,紅棗6粒煲雞胸肉或豬展湯服,有補血作用.
芳姐你好，我先生食緊薄血丸，咁佢可否飲用大南杏，百合無花果，柏子仁，酸棗仁湯，同時買炒過酸棗仁，功效是否會好啲，但我啲酸棗仁磨咗粉可以用嗎?多謝芳姐為我解答
娟:
酸棗仁有安眠作用,但味較酸,如果磨粉放少些.你提的湯方服薄血丸都可以飲用的.
芳姐你好，我想問食緊薄血丸可否飲用柏子仁，因為我先生成日都失眠，要晏到6點幾先瞓得著覺，因為想煲大南杏，柏子仁，無花果，百合，比我先生飲，好似話失眠都幾好，是嗎?成日麻煩你，多謝你
娟:
柏子仁的確助安眠,可配些酸棗仁同同,加南杏,百合,無花果都適合.
芳姐你好多謝你的答覆我還有個問題就是我以前便秘飲一款湯就是大南杏、百合，’柏子仁，無花果煲湯，飲咗都對於便秘都好，呢款湯一星期可以煲幾多次，同時你講南杏，無花果就咁三樣就可以煲幾耐
娟:
可用南杏,無花果,柏子仁,或松子仁都有助排便,且能潤肺養顏,不寒涼的.
芳姐你好，我再想問急凍鮑魚煲水飲，煲一小時，鮑魚性質比較寒涼，因為我初初飲就冇問题，但係飲得耐咗就覺得半夜起身個頭有啲轉地，我本身都有耳水不平衡，仲係比較嚴重，唔知係唔係我飲得密，因為我之前久不久就有便秘同難去，但係自從飲咗鮑魚水之後就日日鄀有得去同好容易去，所以我就隔一至2日就煲1次，不過我有落羌同瘦肉，1隻鮑魚，大約煲1小時10分鐘，多謝芳姐解答我的問題
娟:
通常濕重者容易出現耳水不平衡,急凍鮮鮑過食也會令濕重增加,易便秘可以多用一些杏仁松子仁,無花果加入湯料中,有助潤腸通便.試停用鮑魚一段時間,看是否鮑魚引起?眩暈時可用法夏,茯苓,白朮各3錢,陳皮2錢,甘草2錢,5碗水煮成2碗服,連服2~3劑,有良效.
芳姐你好多謝你的回覆，我想問如果唔用紅棗可否用南棗，同時血癌難唔難醫，其實我先生都有很多問題例如個肝，腎，心藏，又有腹水同肺水，我有朋友叫我轉睇中醫生，佢話睇中醫對肝很好同個腎，所以我都想同我先生去睇，醫院醫哇話藥物有限，如果藥物都幫到佢，個肝祗衰退落去，所以我想睇中醫，不過要耐性去睇，我朋友個先生睇中醫醫咗2年先好返晒，芳姐多謝你的回覆。
芳姐你好，我想問如果我唔想煲紅棗，因為我怕熱氣，可否改用南東煲多謝你解答
娟:
南棗其實更有益,但紅棗味道較好,所以我的湯料才多用紅棗.
芳姐，
多謝妳那良方 : 黑色桑椹子,青仁黑豆白鑊慢火炒12分鐘的配方，我照做然後给予丈夫飲用大约８次了，效果很好聽覺清晰回復有９成，同時我亦有参考妳網上的湯療讓他服食例如:耳鳴眼花～女貞子响螺乾湯。
特此相告和感謝妳！祝妳安康天天開心！
Annie Koo
Annie:
謝謝告知!這樣其他有相同症狀人士可參考應用了.^^
芳姐：
妳好！我也有問題向妳請教湯療的調理，我丈夫現年75歲剛見過耳科醫生和做耳測試，測他聽覺只有7至８程度，醫生健議用助聽器幫
助聽力，但他總是拒絕不願配戴。
他情况如此可有湯療幫肋呢？劳煩芳姐花點時間為他提供湯料療理，謝謝妳啊！
Annie Koo
Annie:
你試去買黑色桑椹子,青仁黑豆,青仁黑豆沖洗後白鑊慢火炒12分鐘,入玻璃瓶儲存,每次取2湯匙,加入1湯匙桑椹子入壼內,注入開水焗15分鐘飲用,可沖泡至淡,每日1杯,飲2星期,看能否改善?茶料浸軟後可以食用,更為有益.
芳姐,
妳好！多謝妳抽宝貴時間為我配合湯療,我會跟隨良方飲食两个星期,效果如何定会告知。
祝妳安康！
Annie Koo
芳姐你好，想問如果有痛風，黑豆可以轉用其他食材代替嗎？
Wendy:
有痛風黑豆可改用栗子3兩代替.
你好，芳姐，本人33years，哩二日無啦啦耳鳴，心口有拿住感覺，睡得不好，4點好快醒，眼睛有小小眼屎。可以煲什麼湯？thx
m:
你試用芹菜4兩,淡菜瓜(俗稱旺菜)2兩,紅棗5粒煲瘦肉湯服,有助清肝熱,平肝火,明目,改善耳鳴,連服3劑.最好去看醫生作檢查,看是否血壓高?
芳姐：你好！
我阿爸今年75歲，7月頭抽血驗出高血壓，開始食降血壓藥。但9月頭左右，出現耳鳴，睇左西醫、中醫，但成效一般。耳鳴聲好似發電聲，時大時細。請問有什麼湯水或茶飲適合他？感恩！
Lun:
耳鳴如果因情志變化而波動,兼見頭暈,目赤,面紅,口苦口乾,是肝火上擾,可以多用桑葉,菊花,淡竹葉煲水代茶服,滾10分鐘可飲,可常服;如果因肝腎不足,夜間尤甚,兼見虛煩失眠,可用炒香的黑豆(白鑊慢火炒12分鐘儲存,每次用1湯匙),加黑色桑椹子1湯匙泡茶常服.
芳姐，新年快樂，祝你身體健康！笑口常開！
想向你請教，關於耳鳴。
本人39歲，上年冬天開始耳鳴。
經中醫治療四、五個月後，已經好番。
但今個冬天，又發作，搵番同一個醫師都無幫助。
而且呢兩個月，經期都遲咗一星期。
其實係咪因為踏入更年期？
另外請問有冇食療可以幫助耳鳴？
日間無問題，因為普通生活嘅聲音已經蓋住耳鳴。但每當入睡，就比較大聲，而且晚上伴隨令人焦慮，有時覺得耳仔入面有少少唔舒服。
請問有冇方法舒緩？求賜教🙏
Nat:
耳鳴有多種原因引起,首先要留意自己血壓,是否高了?肝火上擾或肝胆濕熱,可以用海蜇及馬蹄各2兩煲水服,或泡些夏桑菊茶飲用.如更年期腎虛失眠可用黃精1兩,天冬5錢,五味子3錢,紅棗5粒煲瘦肉湯服,連服3劑.氣血兩虛可用人參或黨參3錢,圓肉5錢,杞子3錢煲羊肉湯服,也是連服3劑,看能否改善?
我無血壓高。
謝謝指教！
芳姐, 您好!
因家人有痛風, 唔用黑豆,可以用別的配料嗎? 謝謝回覆!
黃小姐:
可用栗子代替.
芳姐你好，想問下響螺乾浸幾耐水，浸過d水要唔要，響螺好像你圖中大，謝謝
Lee:
響螺沖洗後用清水浸半小時可出水,浸的水可以一齊用來煲湯.
芳姐：
媽媽已經年過70，最近她覺得嚴重耳鳴，全日都有“溫溫”聲，已睇西醫，因為老化，都沒有甚麼藥可醫….
請問有否適合食療/茶療可介紹？感激！
afzyafzy:
你可以試煲這款防治耳鳴的湯水供服,主要年紀大腎虛引致,可一星期3劑,服兩三星期,看能否改善?此湯全家可飲.
芳姐 家母近兩年經常會耳鳴 有時候會頭暈 頭搖一下就很暈 甚至有時候會想嘔 請問有什麼食療或湯水適合她吃 謝謝
Karen:
你可用法夏,茯苓,白朮各3錢,陳皮2錢,紅棗5粒,5碗水煮成2碗服,連服3劑,看能否改善?
芳姐你好
請問素食可用什麼替代螺頭
謝謝🙏
Echo:
不用螺頭,加些姬松茸,金針菇或蟲草花這類菌類有提鮮及補益作用.
謝謝芳姐🙏😊
芳姐你好！請問哩隻響螺乾有掩扁身 和 1粒粒果d紅啡色乾螺頭，有甚麼分別？那種較好呢？謝謝🙏
Elaine:
圖中這些是美國響螺乾,煲湯清甜好味,滋陰補腎.一粒粒那種乾螺頭是雜螺切粒曬乾而成,價錢相差甚遠,當然食味亦相差很多.
芳姐你好，還有想問（響螺乾有掩扁身）我見都有分美國產同南非洲產，咁兩者之間點樣分？同那種較好昵？
Elaine:
響螺乾有[掩]那種營養含量較豐富.我多數用美國響螺乾,南非的我未試過,應該都不錯的吧!
芳姐，已經耳鳴頭暈頭脹左一星期，睇左兩次西醫都未好，一直耳鳴煩到瞓唔好生活好困擾，請問有咩湯水可以介紹？唔該晒
我想去濕， 但我又不能食涼東西（如薏米。。。）， 請問芳姐 我可以煲咩湯水飲用？
MMB:
你可以用雲苓,白朮,扁豆衣各3錢,陳皮1個,紅棗3粒煲水代茶服,不寒涼的.可一星期3劑去濕.
謝謝你 @3@
芳姐，已經耳鳴頭暈頭脹左一星期，睇左兩次西醫都未好，一直耳鳴煩到瞓唔好生活好困擾，請問有咩湯水可以介紹？唔該晒
Ki:
你試用黑豆1兩,黑桑椹5錢,茯苓4錢,白朮3錢,陳皮1個,冰糖適量,5碗水煮成2碗服,連服3劑,看能否改善?如症狀未能改善,建議看中醫治理,中醫對治理耳鳴,頭暈頭脹頗具療效.
芳姐您好，
我表妹廿多歲，患上新冠肺炎無用藥物﹑靠自我抵抗力剛剛痊癒，另外佢本身BB時期到而家都有濕疹。
請問有咩湯水食療適合佢慢慢補返身體？
謝謝賜教。祝 健康平安
A
A:
肺炎剛癒,暫時不要用補品,可以用鮮魚腥草2兩,薏米1兩,蜜棗2粒,先用5碗水將薏米,蜜棗煮30分鐘,加入魚腥草滾15分鐘湯成2碗,一天分服,連服3劑,有助清體內餘毒.
謝謝芳姐回覆。
再請教，大約多久不要補身？及稍後時間她適合飲用什麼湯水恢復身體？ (備註︰有多年濕診)
再次謝謝！
A
A:
大約一週後無任何不適可以煲些青木瓜雪耳杏仁排骨湯;虎乳靈芝雪耳杞子無花果鷓鴣或鵪鶉湯補肺氣,用量隨意.濕疹可以用土茯苓1兩,赤小豆,薏米各1兩,紅棗6粒,陳皮1個煲排骨湯服,一星期2劑.
芳姐你好多謝你的回覆，我想問如果唔用紅棗可否用南棗，同時血癌難唔難醫，其實我先生都有很多問題例如個肝，腎，心藏，又有腹水同肺水，我有朋友叫我轉睇中醫生，佢話睇中醫對肝很好同個腎，所以我都想同我先生去睇，醫院醫哇話藥物有限，如果藥物都幫到佢，個肝祗衰退落去，所以我想睇中醫，不過要耐性去睇，我朋友個先生睇中醫醫咗2年先好返晒，芳姐多謝你的回覆。
娟:
所有癌症如果早期都可治的,最重要是保持樂觀心態,中,西醫治療更佳.中醫建議看幾間大學的中醫門診,找經驗足夠的中醫教授治療.中醫着重固本培元,先用補益藥鞏固好體質,然後針對治療癌症.
南棗健脾補血又滋腎養陰,可改用南棗.
芳姐你好，桑椹子係唔係藥房胃，仲有四神湯煲紅棗，杞子，桑椹子煲烏雞，紅棗可否改用南棗求椰棗，烏雞需唔需要去皮
再請教「鮮魚腥草2兩,薏米1兩,蜜棗2粒,先用5碗水將薏米,蜜棗煮30分鐘,加入魚腥草滾15分鐘湯成2碗,一天分服,連服3劑,有助清體內餘毒.」
會唔會好寒涼？她本身血壓偏低…能否飲用？
謝謝！
A:
此湯性寒涼的.你可以加些生薑和陳皮同煮.服2劑以清肺熱.之後才燉些補肺氣的湯水飲用.
你好芳姐，最近半夜常常喉嚨痕醒，好像螞蟻咬一樣。煲了些無花果蘋果雪梨干水也沒有效果，現在白天也癢，還好像有痰一樣，可以吃些什麼？
另外個人一直腰酸腿軟，疲倦⋯⋯
可樂媽:
你試用防風3錢,白朮3錢,麥冬3錢,甘草1錢,陳皮2錢,4碗水煮半小時成2碗服,連服2~3劑,看能否改善?睡得不好會易疲倦没精神.先治好喉嚨痕,其它慢一些再調理.