清熱利咽化痰—塘葛菜羅漢果生魚湯
菜檔久不久有塘葛菜賣，塘葛菜又名蔊菜，是一種藥用蔬菜，所含有的菜酰胺等物質，有鎮咳、袪痰、抗菌等作用。
用塘葛菜配生魚同煲湯，有益正氣，並可治感冒咳嗽、慢性支氣管炎及急性風濕關節炎等症狀，加個金羅漢果同煮，有清熱利咽功效，對喉痛、牙肉腫痛都有幫助。
用料是：塘葛菜4兩，金羅漢果1個，生魚1條，生薑3片，蜜棗2粒。
做法：塘葛菜去根及枯葉，洗淨；金羅漢果拍碎；生魚劏洗淨，用少許油煎香後入魚湯袋中；燒熱8碗水，將全部材料加入，大滾後轉中慢火煮個半鐘成4碗即成。
~ 小貼士：此湯清甜可口，老少可飲，對骨火盛及面眼浮腫者亦有益。但體質虛弱及婦女來經期少飲。
芳姐妳好：我想問下我先生熬夜後牙肉腫痛飲乜嘢湯水或食乜嘢？唔該芳姐
Coco:
可以簡單的用很濃的鹽水潄口,每啖吟半分鐘,一日2次可消炎消腫.食療可以煲些皮蛋鹹瘦肉粥供食,或用大豆芽菜半斤,雪耳2錢,老豆腐2磚煲瘦肉湯供服.
唔該芳姐🙏
芳姐因我中了甲型流感己吃特效藥請問康復後可吃什麼束調理謝謝
Ada:
流感好後可以用花旗參3錢,老黃瓜1個,赤小豆,扁豆,薏米各1兩煲瘦肉湯,花旗參片後下,全家可飲,有清熱養陰等功效.
多謝芳姐回覆,流感己好番但條舌很白及小小頭暈請問可飲此湯
Ada:
流感已康復可以飲花旗參老黃瓜湯,頭暈可以加5錢茯苓同煮.
多姐芳姐回覆請問是否花旗參和老黃瓜瘦肉便可不用加其他東西對嗎？謝謝
Ada:
花旗參老黃瓜瘦肉湯,可加赤小豆,扁豆,茯苓,有助健脾袪濕.
芳姐你好！
小朋友5歲，呢排成日打噴嚏，每天打6-8個左右，不分日夜，請問可以煲咩佢飲？虎乳靈芝有冇幫助？謝謝！
Angie:
你可以先用辛夷花8朵,蒼耳子2錢,白芷2錢,4碗水煮成2碗供服,可加蜜糖,連服3~4劑,可改善鼻敏感.虎乳靈芝可以煲湯作調補湯.