健脾益胃—猴頭菇鮮淮山黨參雞湯
猴頭菇抗菌抑菌作用很强，而且能抗發炎、抗潰瘍，對慢性胃炎，消化系統疾病均非常有益，同時它能增强免疫力，降血糖、抗疲勞，是不可多得的食療佳品。
鮮淮山、黨參、蓮子、紅棗亦是對脾胃功能有益的藥材，今天便推介這款健脾益胃湯水給大家。
鮮淮山能健脾益胃、養陰生津、止瀉。黨參能改善脾胃及肺功能，又能補血生津、降血糖、提升免疫力。蓮子又稱「脾之果」，能助消化、清心、健腦、助安眠。紅棗健脾補血。數物和走地雞合而為湯，營養豐富，對胃炎、胃潰瘍等消化系統疾病者甚為有益。
用料是：猴頭菇3朵，鮮淮山4兩，黨參1兩，蓮子1兩，生薑3片，紅棗5粒，走地雞半隻。
做法：猴頭菇浸洗淨；鮮淮山去皮，洗淨切段；黨參、蓮子浸洗；紅棗去核；走地雞斬大件，出水；全部材料用9碗水煮2小時成4~5碗即成。
~ 小貼士：此湯清甜美味，老少可飲。對病後、手術後脾胃功能減弱者甚有幫助。但外感未清者不宜。
芳姐
你好 ，2月頭時時有一次痾嘔，但冇就醫，之後一直反反覆覆 初時肚脹，最近成日有便意 想去廁所 但有時痾唔出 好似便秘感覺咁 如果有得痾就好似痾唔乾淨咁 大便都係軟爛 有食物殘渣，有睇醫生 醫生話有炎症 食咗幾日藥好似無改善咁 請問有無湯水 或者一啲方法可以改善 謝謝芳姐！
Joyce:
你的情況可能病毒,細菌未趕走,可以去中藥店買些蒲公英茶來泡茶服,蒲公英能消炎殺菌,連幽門螺旋菌都可消除,但要服多幾天.便秘唔夠氣,可以用些益生菌丸或[順便茶梅]之類來通便,我有食用[蘋果果膠],效果唔錯.炎症未消不宜服補益湯水,先消炎再調理.
謝謝芳姐回覆 但現時有食緊藥 可否飲蒲公英茶！但我這種情況屬於便秘 就係有啲痾唔乾淨感覺 大便有軟淋！請問蘋果果膠係邊只牌子 現時情況 我可以食嗎？
芳姐：
我在超市買了一盒兩支的韓國鮮人蔘，想學煮人蔘雞湯。最近天氣乾燥，適合煮這湯嗎？請問配些甚麼材料可使湯不燥熱？11歲小孩適合喝人蔘雞湯嗎？謝謝！
Wing
芳姐你好!我想問下40幾歲女性，啱做完心瓣微創手術，
可以煲D咩調理下。謝謝!
Jiuli:
做完微創手術可以清燉一些瘦肉汁或走地雞汁服用以增强體質,走地雞要去皮清燉,不要肥膩.
謝謝芳姐
請問小朋友六歲，黎緊做切除扁桃線手術，請問呢個湯水術後可即時飲嗎？謝謝
ada:
小朋友手術後可以先用青欖15粒,青蘿蔔1個,南北杏1兩,無花果3粒煲瘦肉湯供服,以利咽消炎.過兩天可以煲這款補益湯.
謝謝你芳姐
朋友做完腸腫瘤(良性)切除手術後，可能由於腸短了，以至常常肚瀉。食止瀉藥又變成便秘。請問有什麼湯水可以改善情況。朋友不吃肉，但海產可吃。謝謝！
Ellen:
四神魚湯能健脾實便,減少肚瀉便溏.四神是淮山,蓮子,茯苓,芡實各5錢,可加生薑,紅棗同煮小海魚湯,一星期2劑試試.
謝謝
芳姐，
小朋友6歲，鼻敏感同濕疹最近較嚴重，睇左中醫話佢脾虛，請問有咩快靚正健脾湯水適合？滾湯得唔得呀？
bbg:
你可用太子參,茯苓,白朮,薏米,淮山各5錢,冰糖適量,7碗水煮成4碗,分2天供小朋友飲,連服3劑,(飲6天),有助健脾袪濕,好味的.
芳姐早晨：
請問我囡囡18歲
腸胃長期唔好【肚屙】
我需要煲乜野湯水比佢飲調理
謝謝芳姐
Angel:
你可去超巿買四神粉,每天開水沖1杯給囡囡服,對脾胃差肚瀉很有益.四神是淮山,茯苓,蓮子,芡實,自己買材料各用5錢煲紅棗,瘦肉湯服亦佳.
謝謝芳姐
請問屋企老人家需要每個星期做兩次腎透析，做完都會唔舒服，冇精神和胃口，請問可以煲D 什麼湯水調理？唔該嗮
Zoe:
可用荔枝核7個打碎,洗米水3碗,豬腰1個去筋膜洗淨,3碗洗米水煮成1碗供服,連服3~4劑,能改善腎衰竭等不適.現在荔枝當造,可以儲起大粒的荔枝核曬乾備用.但荔枝患者不宜服,會上火.可以煲些紅棗小米肉碎粥供食,有助健脾胃,改善精神不振.
你好芳姐,剛剛做完微創子宮肌瘤手術第三日,請問可以煲什麼湯水不太燥不太過補？
Joe Chung:
手術後可用些淮山,杞子,蓮子,百合各適量煲些豬展或雞胸肉湯服,或用清補涼材料煲竹絲雞湯服都不寒不燥,全家可飲.只要不太肥膩,用料不太峻烈都適合.天氣熱可用金針,雲耳,紅棗滾節瓜瘦肉湯服亦能補氣血.
請問芳姐,這個湯喝多久才可喝魚湯？另外請問可以喝什麼魚湯可以介紹？
Joe:
4~5天可以飲石崇魚或海鱸魚湯,有助加快深層傷口康復.可配淮山,杞子,紅棗,生薑,或配黨參,北茋各3錢,圓肉4錢左右煲魚湯.