By 芳姐 ( 13 9 月, 2010 at 8:08 上午)
· Filed under 癌症
腫瘤的發生是本身正氣先虛,以及用藥物治療亦有損正氣,故癌腫食療多側重於扶正,尤其手術後,放療及化療後的扶正固本更為重要.
[雪耳核桃燉海參]有補腎益精,潤肺養胃等功效.對癌症體虛者,或軟組織肉瘤患者,肺癌患者,皮膚癌患者等及各種放療,化療後形體虛弱者都有幫助.
用料是: 雪耳3錢,核桃肉1兩,水發海參1~2條,瑤柱1兩,紅棗6枚.
做法: 雪耳,瑤柱,核桃肉浸軟,雪耳去蒂;海參出水,切塊;將全部材料放入燉盅內,注入沸開水3碗,隔水燉約3小時,即可連湯料同食.
~ 小貼士: 常服此湯,有增强白細胞吞噬能力,改善癌腫症狀,縮小腫瘤等作用.但脾虛濕盛,大便溏薄患者不宜飲用此湯.
Permalink
芳姐，你好！請問點樣發海參？
Crystal:
如果是秃參或刺參,先浸水半天,放入沸水中煮20分鐘,熄火焗水2小時,然後用清水浸1晚,第二天用剪刀開肚,去腸,擦去泥砂,再投入沸水中煮20分鐘,焗水2小時,倒出用清水再浸1晚,第三天用筷子穿插得過表示發好,可分包作冰格儲存,隨時取用.浸發海參忌油,故器皿要乾淨才成.
謝謝你詳細講解！
芳姐，您好，本人母親患肺癌四期，食化療藥前，煲什麼湯水打好身體底子呢？可以飮魚湯嗎？
Han:
可以飲魚湯,用蓮子,雪耳,百合,杏仁,無花果各適量煲瘦肉湯服亦佳.或用姬松茸3錢,杞子3錢,蘆筍4支滾瘦肉湯服,有助抗癌.
多謝芳姐回覆
煲什麼魚比較好？
Han:
可以去鮮魚檔買細細條非常新鮮的小海魚.只要新鮮就成,任何魚種都得.少用激素飼養的快大淡水魚.無鱗魚亦少用.
多謝芳姐回覆，感謝您！
你好芳姐，
媽媽80 歲（不吸煙），剛驗到肺癌，已擴散至骨，精神尚可但常
嘔吐，食欲下降，不是嚥不下那種，食任何東西都會想嘔
未開始任何治療，請問有甚麼可煮給她吃和喝？
去年57 歲的哥哥（吸煙）也因肺癌去世，媽媽可能有些少鬱結所致
Yammie:
其實吸二手煙的禍害較吸煙者更甚,故令堂可能吸二手煙太多,或在廚房及煤煙太多引致肺癌都未定.你試用紫蘇葉3錢,生薑3片,甘草1錢,3碗水煮10分鐘供服,有助止嘔.連服3劑.
芳姐，
謝謝你回覆，剛知道，癌細胞已擴至腦，現在仍能步行，食物以粥為主，下一部會食標靶藥，請問如海參可配甚麼煲呢？燉還是煲好呢？
謝謝回覆！
Yammie
Yammie:
海參可配淮山,杞子,瘦肉同燉,燉2小時可食.海參亦可以配高湯煲粥供食,最好切碎令患者容易吸收.
你好芳姐。請問紫蘇葉是否用新鮮的呢? 中藥材店有賣嗎
Connie:
紫蘇葉鮮品可用1兩,乾品在中藥店有售,用3錢就夠.
多謝芳姐
我爸爸79歲 一直都身體健康 但2022年10月中他突然有咳血。所以立刻帶他到ER. 事後得知有肺癌。他12月開始做電療。做的期間他一直都好好 沒有什麼問題 但完成電療後 他的身體馬上弱起來。唔想食， 食完咳，成日都話好攰 要瞓覺. 驗血報告話佢有貧血。但佢馬上就要開始做化療。我想問一下我而家可以煲啲乜嘢比佢呢。
唔好意思 我既訊息好長, 但係見到我老爸咁辛苦 我心真係好唔舒服
Connie:
由於電療和化療都破壞身體造血細胞,所以病者會無胃口,貧血,免疫力衰退.你可以經常煲些四紅湯供服以改善貧血,但不要放糖.癌細胞最喜歡糖,高脂肪各牛奶這類東西的.四紅湯是紅豆,紅衣花生,紅棗和杞子,用量隨意,但煲好後要吃湯料才見效,可隔日或每日一劑.另外黑木耳,雪耳,紅棗煲湯有助造血細胞生長,可以多用,配任何不肥膩瘦肉煲湯便成.或配些淮山,石斛,蓮子,百合等都有助改善疲勞等不適.
我既中醫話我要補陰氣，開左增液湯中藥。建議我平時多食海參雪耳冰糖；而唔適合食紅棗。請問您呢個湯可否唔落紅棗，落冰糖，唔燉只是煲？謝謝
Jess:
如放冰糖就不宜用瑤柱,瑤柱味鹹的.其他材料可以,海參味淡,放冰糖尚可.不放紅棗,放靚無花果,有潤肺養顏功效.
我既中醫話我要補陰氣，開左增液湯中藥。建議我平時多食海參雪耳冰糖；而唔適合食紅棗。請問您呢個湯可否唔落紅棗，落冰糖，唔燉只是煲？
芳姐,你好!
我爸爸有肺癌, 因已80歲,不想老人家辛苦,因此不選擇做任何化療/電療, 希望用中藥調理身體, 想請問芳姐,平時我可以煲咩湯水/涼茶俾爸爸飲會好, 有邊D係可以KEEP住煲,可以經常飲的?
謝謝你!!
Sophia
Sophia:
你可以買絞股藍茶,每天用2湯匙左右泡茶供令尊服,有助固本培元,抑制癌細胞.在皇后大道西149~172號你不妨去逛逛,不貴的,但要選像茶葉那種,不要連枝帶葉的.
芳姐，感謝你的回覆！
想問每次係2 湯匙泡茶，可泡到無味為止？可日日飲用嗎？
Sophia:
是2湯匙,可沖泡至淡,每日飲.
請問芳姐:做緊化療將肿瘤縮細之後才手术切除 尼段期间可否飲鮑魚湯? 未做手术.謝謝!
janice:
鮑魚湯有滋陰明目等作用,腫瘤手術前後皆可服.但如果脾胃消化力弱只飲湯不要吃鮑魚.
謝謝芳謝回覆
芳姐，你好，我爸爸65歲有肺癌，現在做化療中，請問有什麼湯水或者食物可以增強他身體或者減輕化療副作用！希望你可以抽時間解答！謝謝你!
Jo:
你試用人參,北茋,杞子,女貞子各6克,金蕎麥20克,5碗水煮成2碗供令尊服,一星期3劑,能提高免疫力,抗癌,金蕎麥又能減少藥中燥性,解毒袪邪.此方為北京養生堂節目一位著名醫師介紹,名為[增本消瘤方],服一個月試試.
芳姐 媽媽腸癌 化療緊 但白血球血小板晤夠進行晤到化療 食咩飲咩可以提升翻呀？
YIN:
氣喘可以用白果10粒,去芯,核桃肉1兩,紅棗6粒煲粥食,要吃些粥料才見效.
芳姐
我家姐因氣喘睡得不好，食什麼好?
多謝芳姐
芳姐,
有咳、又冇胃口及氣喘可以飲紅羅蔔⼂蘋果,薯仔嗎
YIN:
没胃口又氣喘可以用紅蘿蔔蘋果薯仔榨汁,用量可以每樣半個,不寒涼的.十穀米粥可加塊陳皮及5顆核桃肉同煮.有助止喘,化氣.
YIN:
氣喘可以用白果10粒,去芯,核桃肉5顆,南北杏1兩煲瘦肉湯供服,有助補益肺脾腎,止咳定喘,可一星期2次.
多謝，但氣喘食什麼好？
YIN:
現在有肺炎,必須先治好肺炎才可以服保健湯水.暫時可以用紅蘿蔔,蘋果,薯仔各1個,洗淨,去皮後榨汁飲,每日1大杯,有助抗癌,服抗生素都可以飲.十穀米煲稀粥食亦有助抗癌,可每天服用.待肺炎好了,可以用阿膠(磨粉)5錢,黨參3錢,紅棗8粒,小米2兩煲粥食用,有助提升白血球.隔日1劑.
我家姐子宮癌復發及再影響麻肺癌已做電療及食標把藥,但現在有氣喘及白血球低,另因現在有肺炎可以要食抗生素,請問有什麼湯可以飲.
我家姐子宮癌復發及再影響麻肺癌已做電療及食標把藥,但現在有氣喘及白血球低,另因現在有肺炎可以要食抗生素,請問有什麼湯可以飲.
多謝芳姐，我本身唔識煮野煲野，而家要多多請教芳姐，想問我係大昌見到有急凍海參，是否可用黎煲湯呢？點處理急凍海參先岩？核桃肉係雜貨鋪有無得買呢？
蔡太:
大昌急凍海參買回來可浸洗乾淨後,投入開水中出水,然後煲湯.核桃肉可在雜貨店買,有淨肉連衣那種好些.
請問芳姐呢個湯可唔可以加虎乳靈芝？Thanks
Ling:
可以加虎乳靈芝3錢.
芳姐，你好，想請問我媽媽有肺癌，做過切除手術，而家食緊標杷藥，呢個湯飲唔飲得呢？？另外睇到海參係補不孕，因為我同我先生結婚3年都想要bb,驗過身體醫生話精子較弱，又可否俾埋我老公飲呢個湯呢？煲一個湯兩個人都補到。
新手蔡太:
肺癌服標把藥,可以飲這款湯.精子較弱,可以用肉蓯蓉,巴戟各5錢,南棗6粒,瘦肉適量燉海參湯服,夫妻二人同飲,有助孕作用.能令精子活躍.除了海參,亦可燉海馬1對.配雪耳,核桃肉,紅棗,豬展煲或燉皆可.
多謝芳姐解答, 她的報告剛剛出了是淋巴癌:(
lai:
患癌症的確不幸,但如果悉心治理,家人又支持開解,一樣可治癒.不妨每天沖泡一杯[絞股藍茶]飲,有助減少不適.絞股藍又名金嗓子,除了清熱解毒,尚有扶正作用,任何癌症患者皆可服.可配茶葉一齊沖泡,體質偏寒用紅茶;偏熱者用綠茶.
芳姐, 想請問癌症是否不可以食雪耳, 燕窩及雪蛤膏, 因我老公的妹妹白血球很低, 已抽骨髓化驗但未知結果, 我見你有些湯方說可用雪耳及北茋, 可唔可以講多少少果3種食物不可以食的原因, 謝謝
ｌａｉ：
癌症患者可以食雪耳的，燕窩，雪蛤膏要看患的是什麼癌，如子宮，乳房方面患的癌症，與荷爾蒙有關的就不宜食，其它胃癌，肺癌等可以適量食用的．你可用雪耳，黑木耳各２錢，紅棗８粒，紅糖適量，５碗水煮成２碗，飲湯吃湯料，有助改善白血球過低．因為黑木耳，雪耳有助刺激造血細胞生長．
你好，在芳姐，兒童白血球偏低，平時多飲紅朿水有無幫助，紅朿應否去核，謝謝！
Yam:
白血球偏低,平時可多吃雪耳紅棗水,加些少冰糖亦佳.用量隨意,要經常食,亦可加北茋4片同煮,療效更佳.紅棗要去核.
芳姐，你好，我個仔氣管炎入院，今日出院，但醫生發覚他白血球偏低，要再覆診，確定咩原因，本身我個仔整日病，差不多長期食藥和服坑生素，晤知有無關係？有無湯水可以增加 白血球？謝謝
Yam:
長期服抗生素及服藥,肯定對健康有損.黑木耳,雪耳都有助造血細胞生長,平時煲湯可多用黑木耳及雪耳,加些紅棗,最好放4,5片北茋煲瘦肉湯,對令兒有益.要飲湯吃些黑木耳,雪耳.
ka Po:
令堂飲食宜清淡,少吃含激素的食物,如燕窩,雪蛤膏,肥雞,肥鵝,肥乳鴿及芝士,榴槤等含脂肪高的食物.像鵝,筍,豬頭肉,無鱗魚等發物亦少吃為宜.
多謝芳姐！您真好！幫左我好多！重有，我想問我媽媽有什麼食物不可以吃或介口？
Ka Po:
南瓜蒂有助防乳癌復發,可以用南瓜(要連頂部那個柄)1斤,紅蘿蔔1個,紅棗8粒煲瘦肉湯.或用沙參,玉竹,麥冬各3錢,陳皮1塊,紅棗8粒煲豬展湯都有益.
知道！謝謝芳姐！
咁平時最好食d咩和飲咩湯水好！
芳姐你好！我媽咪剛剛做完成個乳房切除手術，想問飲以上你介紹這種湯好嗎？和我想問藥房教我煲花膠湯得唔得架？內加，海肉竹，淮山，杏仁，紅棗，蓮子，黨心，果皮，幾子，豬肉。有幫助嗎？唔該芳姐！
Ka Po:
剛做完乳房切除,可以用北茋5錢,黨參3錢,淮山1兩,陳皮1錢煲瘦肉湯服,有助健脾胃,益氣血,加快傷口愈合.燉花膠或燉海參湯都有益,但必須令堂脾胃功能恢復了才成,否則難以消化吸收.
芳姐,
多謝你的提示及寶貴建議, 你真好好人 ^^
桑寄生蓮子每次份量多少 ? 煲 1小時可以嗎 ? 蓮子會否使便硬 ?
又再麻煩哂你 !
瘦田:
桑寄生用1兩,蓮子1兩,紅棗8粒,冰糖適量.煲1小時就可以.有便秘人士不宜吃太多蓮子,吃小量没問題的.
芳姐,
想請教你一點意見, 我是個時常手足及身子體溫好熱的人, 除了冬天晚上對腳會感到凍之外,
大多數時候整個人都是熱的, 很容易就喉痛和感冒, 但卻又非常非常怕凍, 每次月事來時的
頭兩天身體怕凍就更嚴重, 返到公司就會換上樽領衫來禦寒. 中醫常說我有濕, 舌頭又黃又白.
想問一下, 雪耳, 紅棗, 鮮奶我適合飲的嗎 ? 因我常喜歡煮這個來飲, 但又會否因此出問題呢 ?
還可有些甚麼好建議的處方可提示嗎 ? 麻煩哂您 !
廋田:
你可能屬陰虛體質,陰虛就會出現虛熱現象,並非真的很熱,故仍然會怕凍.舌苔黃白是濕重表現,你要繼續看中醫作調理,直至舌苔回復正常為止.
雪耳糖水合你飲用的,得閒煲些桑寄生蓮子紅棗糖水都對你有益,能補肝腎,養顏袪濕.又不會太寒涼.
芳姐: 想問下如果唔落雪耳, 我可以換那樣材料都有呢個功效啊??
心急人:
不用雪耳,可以用雲耳或黑木耳;如果不喜歡菌類,就用淮山1兩代替吧!
芳姐:
我買的羅漢果是搖不響的, 不過打開見種子是很乾很淺色的, 是否不好? 煲了的羅漢果水還可以飲嗎? 種子應該是濕潤的嗎?
訪客:
種子有時會淺色的,總之搖不響就是好的羅漢果,可以用.
芳姐
妳好!朋友送我一盒美國花其參,我不知怎樣煮好,如煲湯?
miss mak:
花旗參最好叫中藥店代切薄片,用來沖水焗茶飲.或煲好湯後加1小撮在湯中,焗6,7分鐘飲用最有益.因為花旗參含揮發油,不宜久煮.
芳姐:
聽說羅漢果水常飲有益, 請問羅漢果煲水飲, 有什麼好處呢? 我今天煲咗羅漢果水, 味道好像甜中有點苦澀, 是正常還是羅漢果有問題呢?
訪客:
羅漢果水有清熱化痰,潤肺生津,利咽等功效.大個,搖不響的羅漢最好,煲水飲會有[回甘]效果.你買時揀大個一點,搖不響的才買好了.
芳姐多謝你昨天回覆，但我血壓低貧血唔知可否菊花紅棗片糖煲埋一起飲呢﹖
阿英:
可以加紅棗,片糖的.
芳姐你好,
我媽媽今年 64 歲 , 佢呢以前生我們三兄弟姊妹后做過結紥手術 , 之后就病左 2 年 , 發冷丫等果 d 病 , 佢身體唔係幾好 , 以前有一個中醫睇開既 , 但后來個中醫退休 , 佢就一直無睇 , 佢應該有糖尿 , 最近我聽佢講話 , 佢隻腳好似唔係好行得咁(其實佢以前隻腳都唔好 , 唔係屈親整個 d 痛 , 係身體唔知有咩病 , 試過一下床隻腳就痛到行唔到 , 后黎係睇中醫睇到轉好 , 可惜中醫師退休…), 咁近來佢話腳又開始痛番 , 仲有 , 試過無啦啦隻手臀訓完覺之后瘀左一左片 , 跟住呢幾口 , 佢話隻眼越黎越唔好 , 成日好乾 , 一訓完覺, 未張開隻眼已經感覺好乾 , 乾到張唔到眼咁 , 我媽佢唔鍾意睇西醫既 , 佢好怕 d 醫生斷錯症 , 因為佢以前試過 .. =.= , 所以佢唔信西醫 , 但中醫佢話好多都係黃綠既 , 所以一直都係只睇一個中醫 , 但無辦法 , 他退休了 , 所以我都唔知點算好 , 佢依家既狀況應該飲 d 咩調理下呢 ?
謝芳姐
囡囡:
令堂的情況建議去港大,中大或浸大幾間大學的中醫門診找經驗好的中醫師診治一下,亦要作血糖,血壓等檢查,因為糖尿病最危險的是其併發症,必須要去作身體檢查才成,不可諱疾忌醫!
眼乾可能是糖尿病或其它疾病影響,主要是陰液(身體各種的體液,包括血液,口水,淚液)等不足,可以試用沙參,玉竹,麥冬,天冬各3錢煲瘦肉湯服,能養陰生津.雪耳杞子木瓜瘦肉湯都有幫助.暫時未知是否糖尿病,不要吃任何甜品及吃過甜生果.
用粉葛半斤,生熟薏米1兩,絲瓜絡1兩煲豬骨湯,(6碗水煮成3碗,)有助減輕脚痛.
如果不能食湯料，功效會唔會冇咁好？
PandaJanS:
你說得對!煲湯後大約有70%的營養仍在湯料中,故如果是補益性質的湯,最好連湯料同食.
然而純飲湯的好處是對於脾胃消化力弱,尤其是剛做完手術,或病後,產後體虛的人,熬出來的湯所含的營養成分,人體易於吸收,故單飲湯就已很足夠.
芳姐,
烏雞煲湯是否如普通雞一樣需要去皮的呢?
elaine:
如果是雞檔新鮮劏的不用去皮;如果是冰鮮的去皮比較好,因為冰鮮過程中那些過冷河的水可能會加了少許防腐物質都未定.