By 芳姐 ( 1 7 月, 2018 at 9:17 下午)
· Filed under 外感/頭痛/呼吸道病, 花草茶
天氣悶熱，除了要防暑熱，更要防傷風感冒。今天買了幾個青檸，雖然較一般的檸檬細小，但其所含維生素C極豐富，切片泡茶飲，能增進血液循環、提升免疫功能，還有助生津健胃、幫助身體鈣質吸收。用青檸片配新鮮薄荷葉同煮茶飲，對初起感冒挾暑熱，流鼻涕，喉痛不適，痰多咳嗽，精神困倦者很有幫助，飲上兩杯，不用吃藥病都可能痊癒。
用料是：青檸半個，鮮薄荷葉2棵，蜂蜜適量。
做法：青檸投入熱水中浸片刻，去農藥，切片；鮮薄荷葉洗淨；將鮮薄荷葉用一杯水煮滾，熄火放入青檸片，焗片刻，調入蜂蜜即可供服。一日飲2杯。
~ 小貼士：青檸水含有大量檸檬酸，能有效阻止腎結石形成，所含的「酸柑」物質，類似人體胰島素成分，故糖尿病者可常服。但胃酸過多者慎用。
Permalink
芳姐您好：近幾日我與家人經常打噴鼻，早上起床就流鼻水，喉嚨有小許痛，痰微黃。請問如何調理？謝謝。
Bobo:
你可用金羅漢果1/6個,辛夷花6朵,麥冬1湯匙泡茶供服,可沖泡至淡.
芳姐你好，小朋友流鼻涕差不多成個月了，鼻涕白色渾濁，有食西藥。但唔見好，咳嗽極少，懷疑都係鼻涕所致。請問有咩可以收鼻水，蘋果洋蔥水試過，效果不大。
crystal:
你去中藥店買辛夷花,用6朵拍碎泡茶供小朋友服,如歲半以上加蜜糖,好飲些,每日1杯,連服4劑,有助收鼻水.
芳姐您好，有啲鼻塞，有感冒聲，好怕風，應該係作感冒😷請問可以煲咩湯水飲，謝謝您
香:
你試用蒜子5~6粒,生薑4~5片,紅糖適量,3碗水煮10分鐘成1碗,趁温熱飲.如有改善,晚飯後再飲1碗.
芳姐
請問 我喉嚨唔舒服 好痕、成日痕想咳， 有少許痰透明的， 已起咗兩日。 可以煲些什麼？謝謝。
Helen
Helen:
你試用烏梅3粒,菊花1小撮,甘草5,6片泡茶服,可沖泡至淡,連服3劑,有助袪風止咳.
芳姐你好！小女兩歲半早兩日發燒而家 都仲係發緊燒流鼻水同有少少咳， 燒就一直維持喺37.6至38.2之間 但係啲鼻水就好勁好多係咁流，請問佢可以飲呢個湯水嗎？或者仲有冇其他湯水好介紹？唔該曬多謝你！🙏🙏
訪客:
你可以用蘆根5錢,生薏米1兩,淡竹葉3錢,辛夷花3錢,雪梨1個,去核,5碗水煮成碗半供囡囡一天服,連服3劑,有助清熱退燒,收鼻水止咳.
芳姐你好呀我買唔到新鮮雪梨可以用咩代替？
訪客:
惠康超巿有其他梨賣,如貢梨,香梨等都可以代替.
好多謝你芳姐， 小女已經吃咗6劑已經好咗好多啦，冇發燒同鼻水都減少咗， 現時間唔中有少少鼻水同咳，咳嗰時聽到有好多痰 請問芳姐仲有冇 其他配方可以幫佢清一清呀， 唔該曬芳姐麻煩曬你喇多謝你！
芳姐，
我仔仔4歲，剛剛有鼻水同乞痴
想煲呢個青檸新鮮薄荷葉比佢飲，
但我丈夫買唔到新鮮嘅薄荷葉，
就買左乾嘅薄荷葉，唔知可唔可以照噤煲？
功效係咪一樣呢？
Mandy:
乾薄荷葉氣味較濃烈,故只要放少許就夠,否則仔仔未必肯飲.薄荷葉滾一滾就成,不要久煮.
芳姐，冇青檸用 普通黃皮檸檬可唔可以？
Suki:
可用黃皮檸檬.
芳姐
您好！我的親人過兩天就做肝癌手術了，朋友教我說做完手術後要飲炒米陳皮茶，親人體質燥熱，平時很易上火喉嚨痛有眼屎的，那她適合飲炒米陳皮茶嗎？其實飲這茶有甚麼用處呢？如此茶不適合燥熱體質，那該飲甚麼茶幫助手術後呢？謝謝
kaka:
手術後可以用白蘿蔔1個,陳皮2個煲水供服,不寒不燥,有助加快將麻醉藥排走,通利二便.易上火可以用小米煲粥供服,小米性涼,不會燥火.
多謝芳姐回覆，小米粥可以加甚麼食材同煲適合又不燥火呢？謝謝
kaka:
小米可配肉碎,或瑤柱,陳皮煲粥供食,滋陰又不燥火.
芳姐
您好！上星期我感冒有飲很多熱檸檬水，飲了幾天傷風感冒痊癒了，但月經就不順暢，痛經厲害，請問是否經期不應該飲檸檬水呢? 請指教，謝謝
kaka:
痛經不關事飲熱檸檬水,食生冷東西或飲凍飲才易經痛.可以用生薑紅糖水,趁温熱飲2杯,有助舒緩.